குழந்தைப் பாடல்

குழந்தைப் பாடல் 

(இசையரசு)

 நான்வளர்த்த பச்சைக் கிளி  

நன்றாய் சீட்டி அடித்தது
 ‘அக்கா, அம்மா’ சொன்னது –அது

அனைவ ருக்கும் பிடித்தது.

ஆண்டு ஒன்று சென்றது -அது 

அனைவ ருடனும் பேசியது.

அப்பா தங்கை தம்பி எல்லாம்-தம்   

அகம் மகிழ்ந்து  கொண்டாரே.

‘எத்தனை மொழி கிளி அறியும்?’ –என

ஒரு நாள் அப்பா  கேட்டாரே 

‘ஒருமொழி’ என்று சொன்னதும்-அவர் 

உடல் குலுங்க சிரித்தாரே 

‘பறவை பேசும் மொழியுடனே -இது  

பைந்தமிழும் அறியும் என்றார் 

தம்பி உனக்கு எத்தனை?’-என்னிடம்

அவரும் கேட்டாரே 

‘தாய்மொழி தமிழை நான் அறிவேன்’ -

தயங்கி தயங்கி நான் சொல்ல -அவர்

கலகலவெனவே சிரித்தாரே -நான் 

உளம் கலங்கிப் போனேனே 

பறவையை விடவும் மேலான 

மனிதனான நான் உலகில் 

பத்து மொழியை படித்தாலும்-ஒரு

பாதகம் இல்லை என அறிந்தேன்